Back? A wis nivver awa! A juist hivnae onyhing tae post. Will be tryin tae post mair aften, tho.
A went tae a Scots Independence March & Rally this wis happenin on Seturday. Fur thae thit urnae in the know, the marches ur fur fowk tae gaither an tak tae the streets thair support for Scots independence. Massel bein a massive supporter, a haed tae jyne!
Unfortunately a coudnae fun the stairt o the march, an assumed a missit it, so a tried tae jyne in midwey, bit it turnt oot thay went a different route tae the yin a wis expectin.
A went tae Freedom Square, whaur the march endit fur the rally. A wawkit aboot a explored the stalls set up.
Thare war TERFs thit got a spot an pit up thair bigotit posters, the person mannin thaim claimed tae support independence, bit he wis actively tawkin tae a Yoon wi a fou Butcher's Apron (a.k.a a Union Jack shirt)
Efter a bit, a heard the mairch approachin, an decidit thit a'd be as well tae jyne it at the end, s' a wawkit up tae whaur it wis an stairtin wawkin wi thaim tae the square, gittin massel richt in thare tae immerse in it an tak ma mind aff o the fact it wis anely gaun'ae last 2 meenit wi hou late a wis tae it! Taen some photies on the march as it wis g'in, tho!
A bumpit intae an auld freend fae seicondary schuil thare, turns oot he's a big indy supporter hissel! He wis aw familiar wi the lingo an aw, meanin he wis as much intae it as a wis! That wis guid tae see!
The march settled in, an easily ootnummered the yoons awready thare. The polis haed tae create a buffer zone tae protect us. A fun this oot efter accidentally steppin in it, an bein telt tae git oot...
A'v taen photies o the event wi ma Mavica, an some fowk noticit it, an wis askin gin a wis uisin real floppies. Coorse a shawed thaim thit a wis!
No a lot wis happenin fur a bit, tho, mibbie cause thay war waitin fur the rest o the march tae catch up. A decided tae leave cause a haed suhin else on that day an aw, an pit in fur the various stalls an organisations thare onywey, s' felt a daed ma bit, an left.
Efterwards, a went tae an Amiga Users meetup in Cammbuslang!
