🌙2007-05-22
© Udovič Arns
Geltuonė debesis plaukiuo švėisē žalemė dongou. Blezdingas anūn raiža ė miegaunas sava greitomo. Pri ežerū ondėnės klausuos mona giesmies. Giesmie apė bagalėnė laukėma, apė laukėma ba pabonguos. Vėsė veizas i rītus ė spieliuo, a tik šiou karta saulė na tekies apsėriedžiusė baltā. Baltā, kap ta ežerū golbė, kor naktėmis atskrėnd pri sava vondėns, nusėmet sparnus ėr ein i tomsa gražiuos merguos kūno. Medē ė tėi tīl. Vies so anās nasosėkalb, ka ė kāp praša anū pauoštė rītmetėnė malda karto so anou.
Kuokė spėngonti tīla! Kažkuoks naramoms, katros vėrpėn vėsėms gīvems šėrdė. Deivė Aušrėnė jau atkel saulės vartus, pru katrus tor ėšplauktė laivelis arba ėšbiegtė joudbierē žėrgā.
Vėsė stuov ė veiz i rītus. Stuov ė lauk. LAUK.
Ėš kor anėi tėik kontrībės tor? Ė kāp gal vėlks stuovietė šalėp zoikė ėr anam nieka nadėrbtė? Kāp gal sostuotė biegtė opalis? Kāp gal vėsū gīviu, net kūliu tāp pat līgē, šėrdės mošt vėino rėtmo, ka net gėrdas dondiejėms? Kuokė darna!
Bet jau kai kas jod…
Jau matuos kraštielis laivelė…
Stėpresnē švėisuos srautā sroven pru kraštus…
GREIČIAU!!! Vuo ta teks mėrtė napamatios tava apdara! Greičiau… Prašau, mona saulė, greičiau!
Vuo lig klīksma - akimirka. TIK vėina akimirka. Vėina sekundė ė sviets keitas. Tik blīksnis ė sūris. Ka tik būtom sūris.
Vėsė veiz i rītus, vuo lėkos tik akimirka…
Čė pėnktuojė ainūra giesmie. Ainūrs stuov pu amalo ė veiz so nekontromo i rītus, kor tor patekietė saulė… Vėlnios, 2001 pabonga