💾 Archived View for arns.lt › f › kor%C4%ABba › Ain%C5%ABra_g%C4%97ism%C4%97s › a › 6_milda.gmi captured on 2024-08-25 at 00:26:13. Gemini links have been rewritten to link to archived content
⬅️ Previous capture (2024-08-18)
-=-=-=-=-=-=-
Created: 2007-05-23 Copyright: © Udovič Arns Language: sgs
Ūkanuotūsiūs kalnūs, kor nikumet napatek saulė, kor par metra atstoma namatā sava ronkas, kor gīven tik padarā, katrėms narēk akiū, given atsėskīrielis. Atsėskīrielis bova vėsumet vėns, nes ons vėsor matė tik joudōjė posė. Ons liōb nagėrdies paukštė gėismies, naožous skanė tolpės kvapa. Anuo gīvenėms - vėn niorzgiejėms ont vėsa svieta. Bet tas dā ne vėsks. Jė ons būtom, kāp anuo vards saka, tik atsėskīrielis ė borbietom tik savėi, ta būtom vėskas nuormalē. Bet ī kėtāp. Ons ein par kaimus ė vėsāp miegėn pakėnktė gīvėntuojems. Diel kuo ons tāp dara? Nieks nuognē nažėna, bet sklind kalbas, ka ons ī sotverts prīš meilė. Ka anuo dievs ī pats Seuruons, katros naliousībie laika Leddėrbė.
Atsėskīrielė daruomas bluogībės bova jautamas na tik tarp žmuoniū, bet ton jau matė ė patis dievā. Jau anėi taries, ka rēk kou nuorintās pakeistė. Nutarė darītė ghaš. Ka daugiausē par anon kėntiejė Milda, ta anā bova paskėrta pakeistė Atsėskīrieli.
Ton sprėndėma grētā sožėnuojė vėsos sviets.
Atejė laiks veiksmou. Milda jau taisuos i kieli. Jau ī balnounamė geriausė žėrgā, veržlė ristūnā…
Baisi nalaimė lauk svieta. Atsėskīrielis tāp pat žėna, ka pas anon atvažioun pati Milda. Bet kas kaisčiausē, ons ton bova soplanavės karto so Muorduora valduovo. Vėskos bova dėrbama tėkslingā. Vėsė bluogė darbā nokreiptė prīš meilė bova tik tam, ka pati Milda teiktomės pas anon atvažioutė… Ė nazgolā jau neš ėš Muorduora atsėskīrieliou tinkla. Na bet kuoki, vuo apkerieta, priš katron nagal net dievā atsėspėrtė. Atsėskīrielis nuor pagautė Milda, ka varvieklis sostuotom stuorietė, na tik stuorietė, bet ė tīstė. Nabūs tuos jieguos - sviets taps chauotėško, vėsos skīstis sosėmaišīs so tėrštomo ė grīš i pradėni taška. Tumet Seuruons galies kortė pasauli palei sava nuora…
Saulė pasakītom Mildā, kas dedas pas atsėskīrieli, bet tėn Ūkanuotūjū kalnū platībies nikumet napraein saulės spėndolē, nikumet anėi napaliet sošalosės žemės. Nīkštoks senoks pasakītom, ka dā ī vėina galėmībė: varvieklis gal sogertė rūka, bet tam rēk Leddėrbė, vuo ons ikalints pas Seuruona.
Čė šeštuojė ainūra giesmie. Ainūrs kūkčiuodams top pu amalo mėgluo ė meldas… Vėlnios, 2001 pabonga
Page counter: c