💾 Archived View for tilde.club › ~adou › volapop › drims.gmi captured on 2024-08-25 at 00:03:07. Gemini links have been rewritten to link to archived content
⬅️ Previous capture (2022-06-03)
-=-=-=-=-=-=-
* * *
2015 tobul 21. Älogob jonafenäti, notedöl plösenami, in kel jikanitan 'Debbie Gibson' peklotof in kloted di 'BDSM'.
* * *
2015 yunul 21. Flen obik, hiel 'Carl', ed ob äbinobs pö zälül, e jiel 'Linlin' (läxliman jikanitanefa 'Morning Musume.') id äbinof us. Älaispikof hiele 'Carl', säköl va älabom limanami di 'Twitter' e somis. Äspikof Linglänapüko, ab ko kazet Yapänapükik vemik (no leigoäs jiel 'Linlin' veratik). Hiel 'Carl' no äkanom suemön ofi gudiko, klu änätäpretob spikoti pro om. Pikötetof, ab kötet no idämükon spikafägi ofik, to skar nejönik e hog in gug.
* * *
2015 prilul 22. Älogob plakati, su kel äbinons büds stäfanes e gasedemaganetanes, viomodo öjonodoy oki ad nüxänön nibudi, in kel äbinofs limans jikanitanefa 'Hello! Project'. Äninikob ini trif, kö cif äsagom: "Laidaremans nonik!" e stäfans ädönuons büdi me radion. No äbinon trif di 'Hello! Project'. Äcedob, das ba jikanitanef 'AKB48' äbinon us, ab no ämemosevob seimani vomilas mödik, jüs älogob jieli 'Rio' jikanitanefa 'Ebisu Muscats'. Klülabiko äbinof stelan gretik trifa, bi ädugolob cemi, in kel ästanon ramar fotografotabukas ofik. Älogob ofi dönu, du ägolobs lü kvisinöp plödü bumot, ed te obs bofik äbinobs us. Ävokädob: "Rio! You're awesome! Sugoi! Kirei! Kawaii!" ("O 'Rio'! Binol stunüköl! Jönik! Plitülik!"). Älogodof lügik ed ägesagof (Linglänapüko): "No ävilob atosi valik." Äsumob drinedi, kel äbinon vat teik, e galädans tel, peklotöls in leiged, äkömoms ed ämosumoms obis pededitüköl, obi lü poldabür demü nüdranam ini zälül, klülabiko.
* * *
2015 prilul 17. Ibinob pö konsärt grupa ninü el 'Hello! Project' u somik (luveratiko jikanitanefa 'Dream Morning Musume.' ab ba no äbinon). Lülogans votik ed ob äbinobs su teat pos plösen, e grupalimans anik äplödikofs de po kulits e äsegivofs bilietis glatik pro nibudazugot finü vig, kobü läxlimans jikanitanefa 'Morning Musume.', jikanitanef 'Melon Kinenbi', e ba votikans. Äjinos, das jiel 'Abe Natsumi' no ävilof givön bilieti foginane, ab ägetob bilieti de jiel 'Iida Kaori'. Foginan votik äsagom, das äläbob, das ökanob logön elis 'Melon Kinenbi'.
Grupalimans anik nog äbinofs su teat, ed äcedob, das älogob jieli 'Nakazawa Yûko'. Ävokädob: "Nakazawa-san!" ab vom ätulof e no äbinof jiel 'Yûko'. Täno älogob jenöfo jieli 'Yûko', kel äspidof donio de teat, ini focem gianik lotidöpa. Ävilob spikön ko of, mu pato dö lelanälan ofik, jiel 'Hannah' in Nula-Seleäns. Kludo ävifagolob pödü of, ab fino äseidof oki sui stul kovenik ko cilils tel (ofiks-li?) e sunädo änepubof.
Äzigolob boso in focem ed älogob eki, kel äsümilof jiele 'Takahashi Ai' ko heraflökots blonik e lunik. Täno älüvob bumoti.
* * *
2015 febul 20. Gased "El 'TV Guide'" päselon in bumot, kö vobob, e do äbinon dabükot Lamerikänik, jiel 'Sayashi Riho' jikanitanefa 'Morning Musume.' äbinof su tanäd! Veräto ädabinons tanäds difik ömik pro konletans, valiks ko fotografots jiela 'Riho', ab gudiküns (ko fotografots nüdik) inepubons, büä äkanob gleipön onis.
* * *
2014 setul 4. Seiman äsedon obe me pot leä:ktronik videodis anik di 'YouTube' de jidramatans/jikanitans 'Selena Gomez' e 'Demi Lovato', in kels äkotenükofs okis....
* * *
2014 yunul 16. Äbinob pö el 'Japan Nite' ("Yapänaneit") u konsärt sümik in musigöp vemo smalik. Lüloganef äbinon smalik, e gükam onik äbinon nelanälik, do numädi telid (numädas kil) äpledom hiel 'Yoshiki' musiganefa 'X Japan'. Bü fin plösena, no plu äbinon in musigöp, ab älogob konsärti in televidaprogram "J-MELO" domü seiman, kö äjenon zälül smalik.
Hikanitan e musigaprodan 'Tsunku' äbinom pö zälül, e löliko äbrietom. Äprimom ad spikön obe Linglänapüko ed ästeifülom ad tidön obe fraseodis miotik Yapänapüko. Äsagom, das ösötobs segolön ad tuvön vomilis. Äläükom, das no äkanom dunön etosi in Yapän, bi us so äfamom. Suno lotans valik ädegolons, e hiel 'Tsunku' ätifalom se domayan, do äbinon te zao düp: 11.30 soaro.
* * *
2014 mayul 20. Ägolob lü viktualaselidöp, kö äseloy penedamäkis foginik e bankazötis bäldikis pro konletans. Äseloy i gasedis bäldik, e du ädulogob onis, älogob magodi. Primo äcedob, das äbinon magod matikamazäla hikösta obik, ab täno ädasevob, das äbinon matedadel latikum, bi bevü lotans äbinon jikanitanef 'Morning Musume.' Äbinon alo magod bäldik, bi bevü limans äbinofs jiels 'Yaguchi Mari' e 'Yoshizawa Hitomi'. Äbinob so lefredik, das ädrenob, ab sör obik äpemükof gasedis, e no äkanob dönutuvön padi et.
* * *
2014 mayul 7. Drined juegik pistüron sui kum kadas po nünöm obik, klu ägolob lü laukacem ad lavön onis. Nemuiko kad bal äbinon konletanadin: toodamazöt balid jidramatana 'Demi Lovato' (de tat 'Washington'), ab stad onik äbinon jeikik, äsva pilovevegon fa yebifodian. Du älavob kadis, jipul äbeikömof ed äküpof fotografoti jikanitanefa 'Morning Musume.' löpo su kum dinas näi ob. Päsüpädof, das man bäldota obik äsevom ofis. Laukacem äsevädon äs dil lecema pro diseins mödik, in kel äbinons kartonafigurs lifagretik jielas 'Morning Musume.' Jipul äjonof obe, das älöpladoy jeni jikanitanefa 'mini-moni.' in cem it. Ba dönubalamakonsärt-li???
* * *
2013 novul 5. Äbinob kobü musiganef 'TsuShiMaMiRe', ba po teat, ab trif äbinon buikumo äs piyamazälül.
* * *
2013 setul 17. Älelilob, das jiel 'Michishige Sayumi' jikanitanefa 'Morning Musume.' öpubof pö konsärt ed namapedatrif in yofalegad 'Disneyland' in Kalifornän tü del 26id setula.
* * *
2013 tobul 27. Äbinob in zif 'New York', no sevob kikodo. Äfutogolob da parköp (mödadilo no pepavöl) lü lotidöp obik, e jikanitan 'Ishikawa Rika' äkömof lüodü ob, na•föl loatavabi. Ävinegob ofe, ed ästopof. Ätenükof bradi se fenät, sodas ökanob lemufükön nami ofik, tän ädevegof. Äspelob, das dönu ötuvob ofi ninü lotidöp, ab no äkanob.
* * *
2013 prilul 14. Äbinob su sŸt veŸtikŸn in yofalegad 'Disneyland', ba utos in zif 'Tôkyô'. Jiel 'Ishida Ayumi', jikanitanefa 'Morning Musume.', äbinof us, peklotöl in kloted redik e vietik, du jipuls votik, sümo peklotöls, Ägolofs da menamödot, tunöls solajelömis redik e vietik ad jelön ofi demü solalit. Ven ärivob ofi, jipuls votik idegolofs, ed älogodof vemo lügik. Äsäkob: "Nan desu ka?" ("Kis binos?"). "HUNGRY" ("FAEMIK"), äsagof kazeto Linglänapüko ko pron Yapänik. "Onaka ga suita?" ("Faemol-li?"), äsäkob, ed äsiof nen vöd. Kludo ägolobs ad tuvön zibi. Suno ärivobs selidöpi smalik, in kel päselons drinedis, daifotis e difikosi, e du äsukof biskutis u sümikosi, ob äbinob ko matanapär bäldilik Yapänik, kel äcifon selidöpi. Jimatan, kel äkanof spikön Linglänapüki, äkleilükof loteri, keli ädugons ad getön moni pro fien. No änitedälob ad pledön, ab äplimob ofi demü fäg Linglänapükik ofik. Ven dönu ätuvob jieli 'Ayumin', ädispenof motedadelakadi pro ob.
* * *
2013 yanul 1. Äbinob in musigöp smalik, in kel äbinon lüloganef za menas degtel. Äspetob ad logön jikanitani 'Siouxsie Sioux' su teat, ab plas jikanitan 'Exene Cervenka' äbitikof. Äsagof: "Äspetobs zao atosi," e jonöl me doat äl ob, äfövof: "Äspetob ad logön oli." Äsagob ofe: "Pardö, das no äkömob ad logön oli bü neits anik. Ägesagof: "Binos gudik, labob lifi."
* * *
2012 yulul 23. Äbinob pö svimazälül kobü läxlimans difik ela 'Hello! Project'. Äspikob ko jiel 'Shibata Ayumi' e jipul votik (no de el 'Hello! Project'), kel nu äbinof in jikanitanef ko of. Telümanef ofsik älabon nemi folsilabik, kel äsümon ele 'Kira Pika' (ab ädifon), ed äkanitofs tiädalidi ela 'anime' seimik e päfödofs dub plakats su nibuds e ret. Jiel 'Shiba-chan' e jipul votik äplonofs obe tefü tid ofsik Linglänapüka. Äcedofs, das tid äbadon, noe demü tidan abgüä tidamods, ab jenöfo äspikofs Linglänapüki vemo gudiko.
* * *
2012 yunul 30. Äbinob pö trif lanälanakluba jikanitanefa 'Morning Musume.' Primo jipuls äbinofs su teat pro nüdug (u ba äbinofs te su videodajonet), ab poso lüloganef äteilon oki, e mens ägolons lü tops difik. No äsevob, lü top kelik ösötob golön, klu äziglibob jüs ärivob cemi ze gretik, in kel äbinons bams flano. Äjolob su bam, pedränöl vü jiels 'Mel B.' e 'Mel C.' kanitanefa 'Spice Girls'. Ämebob jieli 'Mel. C.', das ya iseivobs od dü zugot balümik ofa, ven ibinof in zif 'San Francisco' (veratos). Brefüpo jiel 'Geri' ätuvof obis. Du äspikob ko ofs, äspelob, das jipuls ela 'Morning Musume.' öninikofs, dat ökanob nüdugön jikanitanefis bal len votik.
* * *
2012 yunul 5. Äbinob pö matikamazäl, in kel musigapremaprogram äjenon. Jiel 'Sarah McLachlan' ägetof premi, tän äkömof ad seidön oki nemediko po ob. Vemo äsmalof, gretota zimmetas neplu 150. Ämeditob bosi ad sagön ofe, a. s. das ijuitob pubodi ofik in televidasökod "El 'Portlandia'", ab ädegolof, büä älabob kuradi.
* * *
2012 prilul 2. Ädupadob fotografotabuki jikanitanagrupa 'Morning Musume', kel äninädon fotografotis nüdik jiela 'Junjun', jiela 'Niigaki Risa', e ba votikanas.
* * *
2012 febul 18. Älogob musigavideodis e reklamis jikanitanagrupa Yapänik 'AKB48' in televid Lamerikänik.
* * *
2011 dekul 4. Äbinob pö plösen fa fredadramatanagrup manik di 'rock and roll' Yapänik. Äbinoms lekanans ganeta 'Up-Front', klu hikanitan 'Tsunku' äkompenom, e läxlimans anik ela 'Hello! Project' id äpödofs su teat. Jiats fol u lul (keninükamü jiels 'Yoshizawa Hitomi', 'Ishikawa Rika' e 'Gotô Maki') ägolofs vifiko föfio ad lanälön lä fredadramatanagrup. Imufob ini föfaked deto, klu jipuls äbinofs ebo fo ob. Ävätälob, va ökontagob-la lögi jiela 'Maki'. (No ädunob osi, bi id in drims no binob sekaliegik.)
* * *
2011 setul 1. Ägetob fomami rigik seledik sirkotüla "BEST MORNING MUSUME ONE". Magods su pödaflan sirkotülaveada äjonons jilimanis balatik grupa e musigastumis (!) ofsik. Jipuls kil (keninükamü jiel 'Iida Kaori') äviälofs. Ed lid zuik su sirkotül äbinon fomam stülü 'rock' lida grupa 'Fleetwood Mac'. Memob ni lidi kelik di 'Fleetwood Mac', ni va lid dabinon jenöfo.
* * *
2011 mäzul 12. Älogob televidasedoti, in kel jidramatans anik ädönujafofs televidapubodi klatädik jikanitanagrupa 'Morning Musume.' de büo yels za deg. In drim votik, äbinob in leselidöp, kö ämusigos dub laodaspiköms. Balido älilob rigädi lida, keli jikanitanatelümanef 'Puffy' äkanitofs latikumo, tän lidi nulikum fa els 'Puffy' it. Älogob vomis anik, golöls da selidöp, ed äcedob, das äbinofs els 'Puffy'. Ab äbinofs limans grupa anik di 'idol pop', ed äbinofs nemuiko kilatanef. Nilü segolöp äbinons fotografans e lanälans mödiks. Flen obik, hiel 'Carl', äbinom us ed äsagom obe Yapänapüko, kelis äbinofs. No äkanob lilön nemi, klu da lenoid äbegob omi Yapänapüko ad dönuön nemi ("Namae, mou ichido!"). Äsagom obe nemi lunik Tsyinänapükik, keli no äkanob memön. Ab du ibinofs us, ikanom remön sirkotüli ed idispenofs oni.
* * *
2011 febul 19. Äkolkömob jieli 'Eliza Dushku' su lesüt fo potöp. Äbinobs flens bäldik, ed äsagob ofe, das enu ilogob fleni obsik, hieli 'Kevane' (flen gudikün obik in gümnad). Äbradobs odi lunüpo, ed ägivob ofe kidi lunüpik su nük.
* * *
2010 novul 13. In voböp obik ätuvob gasedi Larmeniyänapükik. Ädupadob oni ed älogob lartügi tefü konsärt gretik in zif 'Los Angeles', kö musigagrup 'Devo', fredadramatan 'Zach Galifianakis', e votikans ibinons su städ. In gased äbinon magod kölik plösenanas anik, keninükamü limans grupa 'Devo' (polöl "vilälabobotis" goldik pla rediks) e jikanitan 'Yaguchi Mari'!
* * *
2010 tobul 10. Äbinob in sirkotaselidöp, kö vobob. Jiel 'Chris', kel suvo flanof sirkotülis Yapänik pro ob, älabof boki sirkotüla di DVD ko läxlimans jikanitanagrupa 'Morning Musume' su föfaflan. Tiäd äbinon "Tiädamusig de..." bos. Ämaifükob boki, ed in at pla sirkotül äbinon magodasirkotils di 'View Master' ed i (no nolob viomodo) logaparat di 'View Master'!
* * *
2010 gustul 31. Älogob filmoti, in kel jikanitanagrup 'Morning Musume' äbinofs plösenans. Dil balid äbinon Yapänapükik, ab in dil telid valikans äspikons Linglänapüko. Jipuls äbinofs in malädanöp, ab ni ämalädofs ni peviodofs. Poso valikans äbinofs len nibudastopöp, ko stöfanims mödik. Jiel 'Takahashi Ai' älienetikof, bi no äkanof tuvön stöfalievi, nemü 'Fluffy'.
* * *
2010 mayul 17. Äspidob ad lükömön lü jul (gümnad) pötatimiko. Pos timil in kladacem, äbinob in kobikam. Spikotadin kobikama äbinon za "Musig ela 'juke box'", e kanit telid äbinon "Kimagure Princess" (Volapüko: "Ledaut vimik") fa jikanitanagrup 'Morning Musume'. Jiel 'Takahashi Ai' (grupa et) stiliko äkömof ini lecem da miedayan. Hijulan näi ob äsagom: "Binof plitülik." Äbaicedob.
* * *
2010 mäzul 15. Äseadob pödo in lecem. Seadöps muik äfulons, do äbinons seadöps vagik anik pödo, kö äbinob. Limans ömik ela 'Hello! Project' älükömofs ed äsukofs seadöpis. Jiel 'Ishikawa Rika' e jiel 'Fujimoto Miki' äpladofs okis nilo e nedeto, e jiel 'Niigaki Risa' äseadof deto näi ob. Telefonöm polovik ofik ätonon, ed äsustanof in golaveg ad spikön. Äspikof Linglänapüko, ko vödakoboyums seledik, ab pron ofik vemo ägudon.
* * *
2010 mäzul 11. Äseadob pödo in lecem, in kel äjenon plösen musigik. Hiel 'Peter Tork', kel älogodom äs ün floramüp musigagrupa 'Monkees', ästanom fo ob, ätulom ad spikön obe, do äkredom, das äbinob votikan. Täno jiel 'Shirley Manson' äkömof sui städ. Ägolob föfio, ab seadöp vagik balik äbinon in fotografacinem gretik. Äkontagob kontrolömi, kel ätupon tonodi in lecem ed ägüflekon fotografacinemi, dat ästöbon vegi jiele 'Shirley' e danüdanes ofik. Jiel 'Shirley' älogetof lü ob ed ämufükof mudi so: "Diabö! kisi dunol-li?" Ämufükob mudi gesago so: "Pardö!" ed änaifob fotografacinemi ini cem votik, bo selidöp pro koboköm.
* * *
2009 novul 28. Äbinob in gümnad, kö julans älabons herodis stülü degyels 1970 e 1980. In luyal älogob Ziomi 'Bill' (de televidasökod "Famüladin"), kel ätidom danüdami hiele 'Jody', ed in lift maifik po oms ädanüdons sovadiko jiel 'Buffy' e Söl 'French'.
In drim votik, lödayan obik ädefon gnobi e väruli, so ädredob, das seiman önübreikon. Plödio älogob, e yan näilöda ämaifon. Hiel 'Kramer' (de televidasökod "Hiel 'Seinfeld'") ästanom in löd et, hiel 'Jerry' ästanom in luyal fo löd, e täno jiel 'Elaine' älöpiokömof su tridem ed äkobikof ko votikans.
* * *
2009 novul 26. Mot obik (jikel ideadof ün yel 2006) ko ob älükömons lü leseatöp me lödavab. Ägivof obe lestäni ad lägön len völ. Primo völ äbinon näi lödavab, ab täno votaflanü stadion. Limans e läxlimans jikanitanagrupa 'Morning Musume' ädunofs difikosi in stadion, peklotöl in leiged futaglöpagrupa 'Gatas Brilhantes H.P.' u sümikos. Jiel 'Fujimoto Miki' äpolof dinis, jiel 'Kamei Eri' äseatof su glun, e jiel 'Niigaki Risa' äseadof su stul. Du äbeigolob, ävinegof lü ob. Jiel 'Yoshizawa Hitomi' ästanof näi pödavöl, ed ä lägof lestänis okik. Nemuiko lestän bal ämagon jieli 'Yossy' it, komipaspotöl. Ägebof pladi obik len völ, ab kredob, das lestän obik id ämagon jieli 'Yossy'.
* * *
2009 novul 10. Älogob videodi anik jikanitanagrupa 'Berryz Kôbô'. Jipuls äbinofs yunikum ka nutimo; äs sam, jiel 'Natsuyaki Miyabi' älogoff äs in videods gölik elas 'Berryz'. Äplösenofs kaniti stüla Lindänik, ed ämusigofs ito me el 'sitar' e ret. No äbinofs vemo gudik, e plösen ätonon äs bluf. Jiel 'Tsugunaga Momoko' äpolof heroti brefik e blonik, e mot obik (jikel ideadof ün yel 2006, ab älogof videodi ko ob) äsagof: "Binof plitülik." Ägeob: "E vemo fopik."
* * *
2009 gustul 15. Äbinob in selidöp, in kel äbinons kums mödik sirkotülas di DVD nejeriks (pegeböl-la?). Pespearüköl in kums äbinons sirkotüls di DVD limanas difik ela 'Hello! Project', de sirkotülasökod di DVD seimik, so äsukob löfäbalimanis anik. Ävälob jieli 'Tsugunaga Momoko' e votanis, kelis no memob. Nedetü kums at ästanon ramar, kel äninädon sirkotülis di DVD konsärtas ela 'Hello! Project', balat a dolars zao 20. Äsumob sirkotülis anik, kelis patiko ävilob remön, keninükamü sirkotül fa jikanitanagrup 'Melon Kinenbi' ko fotografot jiela 'Shibata Ayumi' su föfaflan. Ävälob kumi sirkotülas, kel öfrädon dolaris zao 120.
* * *
2009 yunul 16. Älogob filmoti nulik "Stelatäv", in kel äbinons danüdam e kanitam in staudöp 'McDonald's'. Mens 'TlhIngan' peklotöl in leiged ela 'McDonald's' äkanitons dö zibs ela 'McDonald's' püko 'TlhIngan'. Äsäkob obi, kikodo staudöp 'Burger King' älabon filmotacanis, bi filmot äreklamon staudöpi 'McDonald's'.
* * *
2009 yunul 16. Jikanitan 'Kago Ai' e man e vom äbinons in televidaprogram. Äseadons lä tab ed äfidons gladakremakekilis. Linglänapüko äsagons: "It's sweet, isn't it?" "Yes, it's sweet." ("Binon svidik, no-li?" "Si, svidik.") Äseadob visü jiel 'Ai', ed äsagob Yapänapüko e cogediko: "'Sweet' tte... shiranai." ("Sagol: 'svidik'... no sevob.")
Jiel 'Ai' ägolof ad kanitön su städ. Nu äbinob in publüg, e städ äbinon fagoseatik deto. Alan äkredon, das kanitoföv kaniti grupa 'Morning Musume', luveratiko "The Peace!" (Volapüko: "Püd!"). Mens nilikons lü städ, ab vög äsagon, das if no blibonsöv in seadöps, no binonöv plösen.
* * *
2009 febul 20. Äbinob in zel, ed ätüvob, das jidramatan 'Tina Fey' ämonitof su bäk obik. Ägüflekob obi ad logön ofi löpü ob, e mens äbeikömons e ämoletirons yäki ofik!
* * *
2009 febul 19. Äbinob su maketapiad Yapänik ed ävisitob buigis difik. Lü buig bal äbinons sirkotüls di DVD nulik, keninükamü banaklotafilmot jikanitana 'Yaguchi Mari'. Prem äbinon gudik (¥2000), ab ämutoy remön i nünömapledi diotik premü ¥5000, klu no äremob sirkotüli. Latikumo ävilob äl buig gegolön, ad tüvon premi sirkotüla (dabükota pemiedükumöl) fa jiel 'Mari' ko hikanitanagrup 'Tôhôshinki'.
* * *
2009 febul 6. Jikanitanagrup '°C-ute' äsöton dajonön oki in bioskop topik. Lä nügolöp ämutob jonön, das no älabob nünömi in bäkasakäd obik. Ji-Deutänan ätuvof in bäkasakäd radionavabi, keli ämojedob ini böket. Cils topik peklotöl äs grup '°C-ute' äbinons in föfacem. In leteatöp äbinon lespad vü föfaked e städ. Seadöps ti valik pibeseidons, ab ätuvob seadöpi in föfaked, nedetü golaveg. (Egalikob bü plösen.)
* * *
2009 yanul 25. In viktualaselidöp ätuvob päkedi grenaflogas 'Raisin Bran' fa fiam 'Kellogg' ko fotografot jikanitanagrupa 'Melon Kinenbi' su föfaflan. In at äbinons päkedils votik, ab grenaflogs nonik.
* * *
2009 yanul 19. Ästebob in dom ko jikanitan 'Ishikawa Rika'. Äsagob ofe Linglänapüko benovipi motedadelik, ed ädanof obe. Täno äsagob oti Yapänapüko ("O-tanjoubi omedetou!"). Äkoräkof proni obik, ab no äkanob lilön difi.
Del at voiko äbinon motedadel 24id jiela 'Rika'.
* * *
2009 yanul 1. Seimo, po kulits, bevü pösods äbinofs jidramatans 'Lauren Graham' e 'Alexis Bledel'. Jiel 'Alexis' äsagof, das drinavat lebadikün su vol binon in zif 'Hanford', in Kalifornän. Äsagob ofe, das vat in zif 'Armona', vesüdü zif 'Hanford', binon nog badikum. (Veratö!)
* * *
2008 dekul 28. Älöpiogolob ko pösods anik in tridem, e flano su bakun älogob föfükamalädis managasedas, jieli 'Jana Irrova' e jieli 'Monique Hajkova', löliko nüdik bofik. Ägolob sui bakun e äfärmükob yani po ob. Täno äleadob bliti obik falön. Jiel 'Jana' älülogof manalimi nog müdik oba, e... (liedö! eglömob reti).
* * *
2008 dekul 17. Älogob musigaprogrami Yapänik. Program äbinon u su VVV ud in sirkotül di DVD, bi äbinons mögs ad välön plöseni lotana plüdik. Ävälob "lotani süpädik", ab no äbinon süpäd gretik, bi fotografot äbinon logamovik. Lotan süpädik äbinon grup, ninädöl jikanitanis 'Nakazawa Yûko', 'Abe Natsumi', 'Yasuda Kei', 'Yaguchi Mari' e jipulis votik tel, ba limans grupa 'Hello Pro Egg'.
In program, jiel 'Mari' piklotof me klots stilü el 'yanki' e herod stilü kanitanagrup 'Kishidan'. Äfeitof ko seiman, ed äsagof lefredikosi Yapänalinglänapüko, ab no memob kisi.
* * *
2008 dekul 3. Jikanitanagrup 'Melon Kinenbi' äsöton binön in televidaprogram hiela 'David Letterman'. Äpreparofs okis ad kanitön e musigön me stums, ab büä ipreparofs okis, musig äprimon, keninükamü kanitam. Ob i äbinob us, yuföl ad preparön. Äbinob ba kanitan, ba nunädan, ba igo hiel 'David Letterman'.
* * *
2008 tobul 16. Sör obik ätuülof kritidalegivotis. Su tab nilü of äseaton bos, keli äkredob yelabuki gümnadik. Su köv äbinons vöds: "MASON H.S." e magods ömik. In magod bal ästanofs jiyubadugans tel e jidilekan ofsik, jidramatan 'Florence Henderson'. Äsäkob obi, kikodo sör obik älabof buki, bi leno äsevob gümnadi 'Mason'. Tän älogob, das buk äbinon fotografotabuk Yapänik, e su köv äbinons fotografots jikanitanas 'Matsuura Aya' e 'Fujimoto Miki' in julaleiged matrodik peklotöl. Ädasevob, das buk ämuton binön legivot pro ob, klu älülogob buki ed ädunob, äsva ilogob oni.
Tän ädrimob, das älülogob televidareklami, in kel ji-Yapänans yunik ömik äbinofs in neflifedotamaket. Bevü ofs äbinofs limans ela 'Hello! Project', keninükamü jikanitans 'Ishikawa Rika' ed 'Ôtani Masae', e ba i limans jikanitanagrupa 'Sheki-Dol'.
* * *
2008 setul 16. Ädrimob tefü limans difik ela 'Hello! Project', ab te memob, das jiel 'Heike Michiyo' ästeifülof ad parkön fagotaleigiko motoravabi.
* * *
2008 setul 13. Äbinob in bioskop, in kel jonoy filmoti, in kel jidramatan 'Winona Ryder' äpledof rouli jilopakanitana u süikana. Äsümilof jiele 'Marion Cotillard' in filmot tefü jikanitan 'Edith Piaf'. Tän äprimof ad kanitön kaniti lefredik Deutänapükik ko vöds äs "Katzen kratzen" (Volapüko: "kats kratons"), e pron ofik äbinon legudik. Äseadob nedetü golaveg e jiel 'Winona' legik äseadof deto. Pos kanit äsmililob äl of ed äjonob ofe dömis tel pelöpiotenüköl. Äsmililof äl ob ed äsagof obe stiliko: "Danö!" Brefüpo äsustanof ed ägrämof lü votaflan obik. Äprimof ad spikön bioskopabüsidanes po ob, du lögs ofik äbinons su vüm obik, klu ämutob kontagön lögi nüdik ofa. Ven äsustanof, äsmililob äl of, ab logodanotod ofik äbinon zunik e dredik, ed äspidof lü stul nilü linumastof.
* * *
2008 setul 11. Älogob plakatis ed eli 'trailer' pro filmot jikanitanagrupa 'ZONE', keli jonoy in bioskops nilik, ab igo no äkanob logön filmoti.
* * *
2008 prilul 8. Jikanitanagrup 'Morning Musume' äprimon ad kanitön kaniti nemü "Mother's Day" ("Motadel"), ab egalikob. Posä dönu islipikob, grup it ädesinon ad kanitön kaniti stülü "metal blägik" tefü el "Nekronomikon", ab dönu egalikob.
* * *
2008 mäzul 29. Ägetob boki gretik, in kel äbinons lememots jidramatana 'Marlene Dietrich': fotografots, plakats, peneds e ret, e mödikos pidispenöl! Ab älüvob boki in nibud, e nibud ämovegon.
* * *
2008 mäzul 10. Ägetob fotografotaplakati susföfükamaläda 'Angie Everhart', in kel lög detik ofa (ab no lög nedetik) äbinon heragik e no pijeiföl.
* * *
2008 febul 25. Äbinob in lefided. Us äbinon i musigagrup 'Beatles', äs limans ilogotoms in yel za 1964. Ägoloms sui städ, e hiel 'John Lennon' äspikom tefü bos. Tän hiel 'George Harrison', ko smilil pülik, äsagom nemi hidramatana (peglömöl), e publüg äsmilon.
Latikumo tü del at äküpob, das äbinon motedadel 65id hiela 'George Harrison'!
* * *
2007 dekul 20. Ibinob in niveratid, ed ävilob tuvön bäkasakädi obik, keli äglömob seimo. Änügolob ini studanaklubabumot ed ätüvob föfacemi Museda Televida Zifa 'Tôkyô'. Mused äbinon in niver Lamerikänik, klu jicäläbs Yapänik sötofs sagön: "Tôkyô TV", ab semikna äsagofs: "Tôkyô Terebi". Ävilob nügolön, ab ämutob tuvön bäkasakädi, klu äsagob jicäläbes, das ogeikob latikumo.
Ägüflekob obi ed älogob grupi glätabokas gretik, kels äsümons selidöpafenätes. In boks fol, kelis äkanob logön, äseadofs (nedetao detio) jikanitans 'Okai Chisato', 'Arihara Kanna', 'Michishige Sayumi', e 'Niigaki Risa'. Äspikob balido jiele 'Kanna': "Konnichi wa, Kanna-chan!" ("Glidis, o 'Kanna'!") Äglidof obi ed äspikof vifiko, dat no äkanob suemön. Tän äspikob jiele 'Chisato', kel äspikof nemödo ed äjinof neläbik. Ägolob ad spikön jieles 'Sayumi' e 'Risa', ab ya imogolofs. Äluvokädob ad vokön jieli 'Risa', ab vaniko.
* * *
2007 novul 27. Äbinob vobik ed äseidob suämis sirkotüles neflifedik. Ätuvob sirkotüli fa jiel 'Debbie Gibson', ed in bukil äbinons magods mödik jiela 'Debbie' e voma votik, nüdik, in löfimekam!
* * *
2007 tobul 27. Flens ko ob ägolobs lü konsärt jiela 'Abe Natsumi (Nacchi)'. No kredob, das äbinobs in Yapän, bi publüg äninädon elis 'gaijin' mödik. Konsärt äbinon in julalecem u sümikos, nen stuls.
Peklotob in el 't-shirt' reklamik filmota "Matikamazäl Lamerikänik" e äseadob näi man vietik bigik neleodik, peklotöl in el 't-shirt' filmota "Podakek Lamerikänik". Kludo äbespikobs filmotis et: kiogudik äbinon balidos, ab sökod ävedon ai badikum. Tän älogob, das el 't-shirt' omik äreklamon filmotis votik bäldikum: "Biribötädöp hiela 'Porky'" e "Etflanü fälid pupas".
Vütimo publüg pämufükon ad mekön pladi pro musigalef. Jiel 'Nacchi' äseadof näi völ, len tab, su kel äbinons telefonaparats za degtel. Peklotof in el 'paisley' blövik e grünik ed äbegof seili (Linglänapüko ko kazetamal), dat äkanofös telefonön. Äskanof, bi telefonaparats no äjäfidons, ab täno cäläb äjonom telefonaparati jäfidik.
Pluamanum publüga änepubon, ba ad remön konsärtacanis. Jiel 'Nacchi' id isegolof, ed äküpob, das nek ästanon nilü el 'mikrofon' ofik. Ägolob usio, dat äbinobös näi jiel 'Nacchi'. Tän jipuls tel Lindänik ävokofs obi. Balan äsevof nemi obik, ed äsagof, das flen ofa älabom nemi leigik. äspikob ko ofs tefü gaseds, kelis älabob ko ob. Gased bal äbinon gased Deutänik tefü penedamäkakonletam, kel äküpälükon ji-Deutänani bäldik. Äspikobs Deutänapüko, mu pato tefü tävs obik in Deutän.
Täno äküpob, das jiel 'Nacchi' igeikof. Herem ofik äbinon nu vemo lunikum, e peklotof in klot lunik klilagrünik. Liedö ästanob nu fagikumo de of (mets za lul), ed äbinob po of! Ägalikob büä prim kanitama ofik.
* * *
2007 tobul 18. Älivodob in tat 'Colorado' u top sümik, e äremob dins mödik ela 'Hello! Project': fotografotabukis, sirkotülis di DVD e somikosi. No ävilob polön onis, klu ägolob lü potöp e äpotob boki gretik domio. Potamon äfrädon nemödikumo ka dolaris fol!
* * *
2007 tobul 6. Limans anik jikanitanagrupas '°C-ute' e 'Berryz Kôbô', peklotöl in klidared e viet, ästanofs näi süt ed äkanitofs, ba kritidakaniti Linglänapükik. Bi publüg äsmalon, ästanob go föfo.
Älogob jielis 'Tsugunaga Momoko', 'Yajima Maimi', 'Okai Chisato', e 'Hagiwara Mai' (kel no älogotof äs of). Jiels 'Umeda Erika' e 'Kumai Yurina' id äkomofs, e do ägretofs leigodü votikans, latikumo vemo äsmalofs leigodü ob. Id äkomofs jipul ko feelids mödik (!), ab no äsevob nemi.
* * *
2007 gustul 29. Ästanob zänodü föfaked in konsärt jikanitanagrupa 'Morning Musume'. Jiels 'Yaguchi Mari' ed 'Iida Kaori' äbinofs nog in grup. Finü konsärt, jiel 'Mari' ädokienof (städ ägeilon) ed ägivof obe nami. Äblegikob ed äsagob: "Arigatou gozaimashita! ("Dani gudikün!"). Täno äsagob ofe: "Dai-fan desu" ("Binob lelanälan"). Äsmililof ed äkidof obi vifiko sui lips!
* * *
2007 gustul 16. Jikanitan e jidramatan 'Mandy Moore' iprünof domi okik klube 'Mythopoeic Society' pro zäl pos kongred ayelik. Jiel 'Mandy' äbeikömof e äsäkof, va kanofös binön in zäl. Äsagob: "Lesi!" Äspikobs kobo, tän ägolobs ini klotikipedöp in slipacem. Us äsäklotobs obis ed äprimobs genakosödi. Ab liedö! Mot ofik (ab veräto äbinof jidramatan 'Allison Janney') äropof löfimekami.
* * *
2007 mayul 17. Äbinob plödo in konsärt, in kel äbinons kanitans difik (keninükamü jiel 'BoA', kredob). Jiels 'Yaguchi Mari', 'Yoshizawa Hitomi', 'Tsuji Nozomi' e limans votik ela 'Hello! Project' äseadofs fo ob. Ävilob spikön ofe, ab äfagikofs ad golön sui städ. No älogob ofis su städ, ab älilob, das logofsös filmoti "Zon peproiböl" in bioskop 'Castro' in zif 'San Francisco', klu ägolob usio ad logön ofis.
* * *
2007 mayul 14. In stajon u flitapof änüremob konsärtabilietis e canis jikanitanagrupa 'Melon Kinenbi'.
* * *
2007 prilul 5. Äbinob ko jikanitan 'Nakazawa Yûko'. Peklotof in klotem vietik ko juüp brefik e hät, in kel jiel 'Audrey Hepburn' peklotofös.
* * *
2007 febul 11. Äbinob in lotidöp ad komön in kongred seimik, e limans anik jikanitanagrupa 'Morning Musume' äbinofs us. Älogob jieli 'Fujimoto Miki', peklotöl in el 'bikini' vietik, in e näi svimaban. Ästeifülob ad spikön ofe, ab te äkanob sagön stupikosi, as sam: "Swimming ga daisuki desu ka?" ("Löfol-li svimi?"). Ädemof obi, ed äfagikof ko jiel 'Ishikawa Rika' e jipul votik.
* * *
2006 novul 19. Älivodob seimo in Lamerikän, ed äbinob in nibud ko jikanitanagrup 'Berryz Kôbô'. älogob limanis nulik, keninükamü jipul, kel äsümilof jiele 'Yaguchi Mari', klu äsukob in buk nulik tefü els 'Berryz' (pepenöl me püks ömik, keninükamü Yapänapük e Türkänapük) ad tuvön nemi ofik. Ätuvob nemi, ab pepenöl me els 'kanji' (penamamals Tsyinänik), kelis no äkanob reidön.
* * *
2006 tobul 26. Äbinob ko limans anik jikanitanagrupa 'Morning Musume', keninükamü jiels 'Yaguchi Mari' e 'Kusumi Koharu'. Äbespikobs, kanitis kelik ela 'Hello! Project' löfobs, Yapänapüko e Linglänapüko. Äkleilükob ofes, das "better than" sinifon "nanika yori ii desu" (Volapüko: gudikum ka bos).
* * *
2006 tobul 11. Konsärt gretik ela 'Hello! Project' äjenon in selidöpalebumot. Äseadob soelo len tab smalik in fidayad, de städ fagoseatik. Täno jikanitanagrup 'Petit Moni' äpubon näi tab obik! Seled äbinon, das jiel 'Ishikawa Rika' äbinof in grup pla jiel 'Gotô Maki', e jipuls äkanitofs "mini-moni Kazoe Uta". No äsevofs vödis gudiko, klu äkipofs papürasmalotülis. Ädabinofs i jilanälans kil u fol in matrodaleiged peklotöl, kels äyagofs jipulis grupa zü tab obik ed ästeifülofs ad glepön ofis!
* * *
2006 mayul 29. Äbinob in teatöp u julalecem, e limans pasetik (e ba nutimik) jikanitanagrupa 'Morning Musume' äseadofs zü ob. Äbinon del lätik yelalafa/konsärtatäva/bosa, e vönaoloveikod ädabinon, das jijulans no remofs zedelafidedi tü jötadel oksik. Jiel 'Abe Natsumi (Nacchi)' ävilof bubamiti, e jiel 'Iida Kaori' ävilof gokamiti. Jiel 'Kaori' äseadof nedetü ob ed äsagof obe Linglänapüko: "Vilol-li remön fidedi jiele 'Kaori'?" Lesi!
Bü fidedatim äbinon nog tidadüp, ab ägolob ad remön fidedi jiele 'Kaori'. Älabob fidedi lönik obik, ko gokalög peloetöl fa mot obik, ab ätikob, das atos no saidonös. Äsludob ad remön gokamiti de staudöp Tsyinänik, no de selidöp 'KFC'. Ab äbinos nog gölik, klu äkobikob ko flen oba, hiel 'Carl', in selidöpalebumot.
Äseadobs fo selidöp, e de at äkömon musig badik stüla 'techno-disco', keli äkanitom hiel 'Arnold Schwarzenegger'! Äspikob flene obik tefä fided tü jötadel, ed äsäkom obi, lü jul kelik jipuls ägolofs. Äsagob, das no äsevob, ab jiel 'Nacchi' äbinof 23-yelik e no plu in jul.
Jiel 'Nacchi' äbinof veräto 24-yelik atimo, leigoäs jiel 'Kaori'.
* * *
2006 mäzul 14. Jikanitan 'Yaguchi Mari' äkobikof ko lampör nulik Rusäna, kel äbinof jikanitan 'Kusumi Koharu'!
* * *
2006 mäzul 10. Jiel 'Britney Spears' äkidof obi sui lips.
* * *
2006 febul 25. Äbinob in maketapiad ko sör obik, äspiköl ofe tefü buk, keli enu iremob, kel äninädon magodi peneda namapenädik fa jikanitan 'Yaguchi Mari'. Äbeigolobs canis jikanitanagrupa 'mini-moni'. Su din bal äbinons däsinots svidik grupa, ed äkleilükob söre ofik limanis difik. Täno älogob televidi, kel äjonon konsärti televidik balik fa grup 'mini-moni' ko limans mäl! Grup äninädon jielis 'Yaguchi Mari', 'Tsuji Nozomi', 'Kago Ai', 'Mika Todd', 'Takahashi Ai' e jipul votik, kela nem eglömob. Ba penemof 'Eriko'. Ab liman mälid no älönedof, bi vemo äbigof!
* * *
2006 febul 25. Ärajanob ad tuvön fleni oba, jiel 'Ellie', in mused in löpatead tüma. Äsukob fleni obik ed ätuvob dajonädi patik, in kel äkanoy remön dinis, ab ämutoy dasukön ramaris ad tuvön dinis. Primo ätuvob bedastofedis e ret, ab täno ätuvob hieli 'Merv Griffin' in ramar. Ävokädob: "He! Kanob remön hieli 'Merv Griffin'!" Ab no ägespikom, e plu äsukob. Ililob sirkoti nitedik in radion, kel ikömon de selidöp at, klu äsukob sirkotabogi. Ätuvob bogi, ab no äninädon sirkotis nitedik. Täno ätuvob boki, kel äninädon pledadinilis, a suämü dolar bal. Ävälob pledadinis pro ob e pledadinis pro hinef obik. Pro om ätuvob motoravabi raänidafomik, ab ven hinef obik älükömom, motoravab inepubon.
* * *
2006 febul 14. Äbinob in sirkotaselidöp, in kel lefided äjenon. Ägolob ini fidacem, in kel völs petegons me sirkots jerik, keninükamü Yapänikos. Sör obik äseadof len tab, e näi of jiels 'Tsuji Nozomi (Nono)' e 'Kago Ai (Aibon)', jikanitans de grups 'Morning Musume' e 'W'. Jipuls bofik älogodofs äs za yel 2001.
Sör obik äjonof obe bosi su völ. Äbinon u sirkot u sirkotül videodik diametü zimmets 30 jikanitanagrupas 'Happy 7', 'Sexy 8' ed 'Odoru 11'. Täno älogob bosi, keli no ilogob büo: geilü zimmets 18 e vidü zimmets 30, in köv klilabraunik ko nem 'Morning Musume' Yapänapüko e däsinots su on. No sevob, kis äbinon, ab äjeron. Äsagob jipules: "Chou takai!" ("Lejeron!") Primo äkredob, das su suämapenäd pipenon: "$66", ab täno älogob, das me els 'kanji' (penamamals Tsyinänik) pipenon. El 'kanji' balid äbinon fümo num 6, ab no äsevob eli 'kanji' telid. Du ästeifülob ad reidün, äsagob jipules suämi, so: "Rokujuu~~...doru" ("Dolars mäldeg...").
Täno äküpob sirkoti bäldik de televidasökod "Kaibutsu-kun". Äjonob oni jiele 'Nono' ed äsagob: "Mou motte imasu" ("Ya labob oni"). Äflekob obi lüodü jiel 'Aibon', kel äjonof obe sirkotüli, keli iremof. Äsagob: "Uuu" ed "Aaa", do no äsevob grupi, kela nem äsümon ele 'Shang Shang Typhoon' (kel äbinon grup jenöfik, ab atos no äbinon nem su sirkotül). Täno äfidobs bosi, keli neföro ifidob.
Atos äbinon drim balid obik, in kel äspikob Yapänapüki veratik!
* * *
2006 yanul 26. Älogob fotografatrifi, in kel äbinofs limans difik jikanitanagrupa 'Morning Musume'. Jiels 'Takahashi Ai' e 'Fujimoto Miki' äbinofs lejönik.
* * *
2005 dekul 18. Äbinob in sirkotaselidöp, in kel äbinon musigalabun Lamerikänik balid fa grup ela 'Hello! Project' -- äs sirkot 'LP'! Köv äbinon nenitedik, blövik e redik ko tonats vietik gretik: "VIYUDEN" (nem jikanitanagrupa). Ätikob, das el 'marketing' äbinon lestupik, bi köv no äjonon magodis jipulas!
* * *
2005 yanul 12. Äbinob in lefided in staudöp kulivik, i limans grupa 'Morning Musume' äbinofs us. Jiel 'Yaguchi Mari' äglidof obi ed äbekonsälof obi, das sötobös smivön mutari Yapänik sui el 'beefsteak', dat vemo benosmekonös. Äspikobs Linglänapüko balugiko, ed äsagob ofe, das löfob ofi. Ägesagof obi, das no kanobs binön kobo, bi binof spionan pro reig Yapänik!
* * *
2004 dekul 4. Livodo ko pals e sör, äkleilükob söre obik, kis binons els 'Pocky' (binons bakotils stafafomik de Yapän), ed ävilob jonön ofe päkedili elas 'Gookie' (bakotilas sümik), keli älabob in lotidöp. Ägolobs lüodü lotidöp da selidöp 'K-Mart', in kel älogob jieli 'Yaguchi Mari' e limanis votik jikanitanagrupa 'Morning Musume'. Ab no ävilob spikön ofes, bi äpolob slipaklotemi! Ävilob tuvön söri obik, dat äkanob gegolön lü lotidöp, klotön obi, e ramenön fotografaparati e bosi, keli jipuls grupa kanofsös dispenön. Sör obik inepubof, klu ägolob soelo lü lotidöp. Ab jipuls ägolofs i lüodü lotidöp, diseinü fotograf vü selidöp e lotidöp. Us äbinofs limans retik grupa. Äspikob vome in sek ofsik, kel pesüpädof, das binob lanälan. Ärivob lotidöpi ed ägolob sui tridem, ab iglömob cemanumi obsik. Älilob palis ed ävokädob ones, ab no älilons obi. Kludo no äkanob tuvön cemi, e no äseivob grupi.
* * *
2004 novul za 20. Älogob jieli 'Fukuda Asuka' (läxlimani jikanitanagrupa 'Morning Musume') ed äsagob: "Sevob, kel binol!" Äsmililof ed äsagof: "Fukuda Asuka." Latikumo älogob jieli 'Yaguchi Mari' ed ästeifülob ad küpälükön ofi, ab no äküpof obi.
* * *
2004 novul 7. Äbinob in voböp obik, e selidöp äbrulon. Jikanitan 'Utada Hikaru' äbeikömof, ed äspikob ko of. Äsagob ofe, das älöfob kaniti "Colors" (Volapüko: "Köls"). Ab pron ofik Linglänapüka no äbinon so gudik äs verato.
* * *
Ün yel 2004. Äbinob in nibud ko jikanitanagrup 'Morning Musume' dü tulavabam zifa 'San Francisco'. Posä isexänobs de nibud, no äspikob ko ofs, bi äsevob Yapänapüki nemödik. Ägolob ini klünacem, ab ven ägeikob, inepubofs. Älelilob, das piravülofs, klu ägolob ad savön ofis.
* * *
Za yel 2000. Ägolob lü lezälizel ko flens kil. In lezälizel ämusigon grup 'All About Eve', e flens obik äbinofs Silanans hiela 'Charlie': jiels 'Kate Jackson', 'Jaclyn Smith' e 'Cheryl Ladd'!
* * *
Za yel 1998. Ävifagolob ve süt, bi ädredob demü els 'helikopter' blägik* in lut, ed ägolob ini selidöp. In selidöp äbinons valasotikos tefü kuliv pöpedik, keninükamü els 't-shirt' mödik ko magods de televidasökods degyelas 1970 e 1980. El 't-shirt' bal äpolon magodi käptena levalanafa 'Enterprise' de "Stelatäv: Letüv", in drim obik televidasökod peglömöl de yel za 1979. Käpten at äbinof vom nemü 'Dawn'**, e rouli äpledof jiel 'Eve Plumb'!
* * *
1990 yulul 9. Äbinob gitaran nulik grupa 'All About Eve', plaädöl hieli 'Tim Bricheno'. Ämusigob ko grup, do no sevob gitarami. Toä kanit "Our Summer" ("Hitüp obsik") äbenotonon. Ästeifülob ad mufükön doatis verätiko, ab täno älogob, das no äkipob gitari!
Tü del 15id äreidob nuni, das hiel 'Tim Bricheno' veräto ilüvom grupi! Seledö!
* * *
Za yel 1990. Äbinob in sirkotaselidöp, in kel äselidon benosmel jiela 'Exene Cervenka'!
Ven älogob jieli 'Exene' in konsärt, ägivob ofe peneti tefü drim at. Äsmilof.
* * *
1979 yanul 14. Äbinob el 'hobbit', hiel 'Bilbo Baggins', kobü votikans tel greta nomik. Po obs äbinon mebamal stonik, e votaflanü süt (nedetao detio) äbinons leglüg gotik ko selidöps nulädik detaflano, süt slimik e glunot slimik, el 'Stonehenge' smalik ko hikleudans zü at, e konsälöp gotik geilik. In pödaglun äbinon zif 'Minas Morgul', ab su fel grünik, no in bels. Stom ävamon.
Ävifagolobs detio su süt, päyagöl fa batay in leiged galädanas ledoma 'Buckingham'. Äfegobs me glävs. Ägolobs nedetio su süt ko bims ve at, po konsälöp, nog päyagöl. Äkötob pul smalik blonik, e mot pula äzanädof obi. Te ävifagolobs pluiko ini zif, jü Nunöp Lamerikänik (bumot nen föfavöl, ko platäd: "US EMBASSY"). In nunöp äbinoms hiel 'Oscar Goldman' (de televidasökods "Man dolaras mälbalion" e "Vom 'bionik'") e soldats neflenik pluik.
* * *
Revidot nulikün: 2015 tobul 21
Dabükot balid: 2008 febul 6
Tikamagot e jenöfükam fa hiel 'Arden R. Smith' (erilaz@earthlink.net)
