💾 Archived View for thrig.me › write › water-grass-journal captured on 2023-11-04 at 12:26:49. Gemini links have been rewritten to link to archived content
⬅️ Previous capture (2023-09-28)
-=-=-=-=-=-=-
.i mi pu de'a troci le nu tcidu be la'e lu le su'u le bradi mo'u klama la tlunranan. lu'u kei ca le nu xa datka goi ko'a cu bajra le cilmo sasfoi to le ru'inai carvi ja solgu'i cu lemkai le ka vensa toi .i ko'a ckaji le ka clani je korcu cnebo .i ci le xa datka cu kandi plexu .ita'o pa jbixa'u cu kipsi gi'e tolpifygau ko'a .i pacna le nu ko'a se'ixru le zdani .i pa pemci zo'u tu'e
datka sutmu'u
.i dicra le nu tcidu
.ipu zuktce ma
tu'u ni'o pa mlatu goi ko'a pu ze'a so'uroi vitke .i ko'a xekri .iku'i ko'a so'u blabi se barna .i pa barna cu jibni le galxe .i zo cados. cmene ko'a .iju'aku'i pa tolci'o ninmu ku suzroi cusku lu la nicte li'u .i la cados. na darsi ga'idai gi'e mutce catlu je tinju'i .i ko'a kalte .ijebo kalte ko'a .i le nunji'e pu'i pluja .i mi'a dunda le cidja .e le ladru .iku'i ko'a toltce citka .i la'a ko'a simsa la rikitikitavis. poi ke'a xarpre la kipling. ku'o le ka kalte .i le re na'e kunti ctikabri ba'o lenku ga'u re'o le balni
ni'o ca ki ku le grusi dilnu ku culno gacri lei mutce cenba crino fi'o se vanbi le vensa .i le ricfoi ku cilmo .i ca le prulamdei mi cadzu be ne'i le ricfoi ca le nu na carvi .i pa pindi pluta cu trixe le purdi .i pa drata pluta cu ragve pa clani je jarki kevna .i le se cadzu be tu'i le kevna na xamgu gi'e cilmo .iku'i mi kakne le nu pagre be le kevna .i mi ca na'e citno .i ko'a goi le drata pluta cu xauzma le pindi purdi bo pluta .i la'a le jbixa'u cu pilno ko'a .i ko'a nalmu'o sruri so'u tricu poi ke'a pu farlu .i le'i sraji lijgri ledgrute to'o vi jorne pa ricyvelvi'u ma'i ko'a .i le vi vensa ricfoi ca'o banro je fusra seri'a le nu ko'a cenba .i to'u mi ve'a zu'o cadzu ko'a to mi ca pilno no kanjunla toi .ije ba bo ko'a ganjdika je nitsalpo fa'a pa canlu be lei cnino dzitricu .i mi ba litru vu'i ko'a .e le pindi pluta .e le purdi gi'e morji fi pa pemci .i fi'o pu se ciska tu'e
so'o mirli cu
ta'e zvati pa purdi
po le'e ninmu
.i ganai da'i
le'e mirli cu citka
zvati pa purdi
gi le'e ninmu
ba fengu gi'e cladu
klama pa purdi
.i le purdi cu
melbi .i le mirli cu
xagji .i nungau
tu'u
ni'o le srasu ca ze'apu sudga .i le claxu be le carvi cu fadni ca le crisa .i mi suzroi tirna tu'a le bifkluza pezli tai da'i le cavyfle .i ku'i le srasu ca'a sudga .i ca le cabdeicerni ku pa cribe krefu snada'i le fesybaktu be le stagi
.i fy. naru'e spofu .i mi pu zutse ni'a pa ckunu gi'ebabo zgipli pa rajyflani .i mligla ne'i le ctino be le ckunu .ijebo le cinki cu tolcando .i pa katcpi zu'a ga'u vu ca krixa .i su'o ckunu pezli cu farlu .i .ei vimcu le pulce
ni'o le danmo be le ricfoi fagri cu memyze'a ca le crisa .i ku'i le nu danmo cu vitci .i le nu danmo cu sotroi le'i pu nanca ca le nu mi zvati ti .i ta'o su'o mirli puzi kelci zi'o bu'u le purdi
vo le vo mirli cu rivbi jersi vo'a bu'u le purdi ca pa cerni co glare .i sumne xu co fagri
ni'o le srasu ca'a crino ri'a le nu carvi .i ji'a le pzeli co'a farlu je skari bo binxo .i le nu tirna be le critu carvi cu xamgu .i da poi pipybanfi ru'inai zvati le drudi te rinci .i se ri'a bo le se krixa be da cu zmadu cladu .i le critu krixa bo pipybanfi cu memyme'a le vensa krixa bo pipybanfi .i le carvi do'e le cabna critu ku vitci gi'e suzroi tsali .i a'o le cabna critu ku ckaji le ka mutce carvi .i le spati cu nitcu le djacu le banro .i je bo le cabna'a cu ckaji le ka sudga .i le cipni ca'a krixa ba le nu carvi
pa pipybanfi
.i pa kirxa ku cabna
le carvi nicte
.i ma kirxa ca pa le
nicte mu'i le nu mo