💾 Archived View for eixos.xyz › Dinamita_cerebral.gmi captured on 2023-07-22 at 16:11:13. Gemini links have been rewritten to link to archived content

-=-=-=-=-=-=-

Dinamita cerebral

De como as redes sociais e os medios de comunicación están a matar a sociedade

TVLixo [IMX]

A maquinaria da propaganda mediática

É ben coñecido que os grandes grupos de comunicación[1] están nunhas poucas mans que teñen o poder de controlar a información. A prensa e os canles de TV, o chamado cuarto poder, son quen de formar e modificar estados de opinión colectivos en moi pouco tempo repetindo cunha única Voz certos mantras ate a saciedade. Algo que aplican con analítico tino superando en eficacia ao mesmo Goebbels.

1: https://medios.ymedia.es/descargas/mapa-de-medios-2019.pdf

A concentración do poder permítelles exercen como grupos de presión de grande influencia no resto de poderes. Non esquezamos que detrás destes grupos de información están multinacionais, bancos, construtoras, empresas armamentísticas... que buscan o beneficio propio. E detrás de todo isto, a escala global, o 95% da información está controlada por unhas poucas sociedades xestoras internacionais.

As redes sociais están tamén controladas por grandes empresas como Google, Facebook-Watsapp, Amazon, etc. Os mecanismos de control da información nestes espazos son máis refinados. Empregan complexos algoritmos de intelixencia artificial para procesar e filtrar toda a información que lles proporcionamos. Con ela cruzan datos, elaboran perfís e os almacenan en grandes bases de datos para facer negocio e controlarnos. O Big data[2] é o [Gran Irmán](Gran Irmán) do noso tempo.

2: https://es.wikipedia.org/wiki/Macrodatos

Entre os intereses que moven a estas empresas non está no primeiro posto o de favorecer á sociedade. O interese social forma parte a miúdo do marketing empresarial que lles proporciona unha pátina amigable e xera máis confianza nos usuarios. En calquera caso, as iniciativas socias deste tipo de negocios son sempre realizadas tendo en conta os beneficios que aportan de cara a mellorar a súa imaxe pública. Beneficios que se traducen en máis usuarios e tamén en máis ganancias. Un exemplo ben coñecido e polémico foi a doazón de Amancio Ortega de varios equipos para diagnosticar e tratar o cancro.

Detrás destas empresas de comunicación, os xigantes económicos que as manexan marcan as pautas a seguir. E todo móvese en función duns intereses concretos que asentan principalmente en dous piares:

A mellora do beneficio económico.

O poder e a influencia.

Estes alicerces retroaliméntanse nun círculo vicioso.

+beneficio+poder+beneficio+...

A concentración da riqueza mundial nunhas poucas mans vai en paralelo á concentración de poder e da influencia. Aproximadamente o 1% dos máis ricos acumulan o 80% da riqueza do planeta. Isto proporciónalles unha inmensa forza para tratar de manter o seu status, algo que están moi dispostos a facer. E medios non lles faltan.

medios 1 sociedade 0

Mensaxes simples para cabezas ocas.

Mentiras, manipulación e influencia.

A forma máis sinxela de manter o status empeza nos propios medios. Quen controla a información ten verdadeiramente moito poder. Xa no lo advertiron varios personaxes célebres:

frase medios [IMX]

Quen manexa os medios ten todas as posibilidades de usalos no seu beneficio e pode mandar as mensaxes que quere, cando e como quere. A omnipresenza e o inmediato e doado acceso á información dos medios de comunicación, fai que esteamos expostos permanentemente ás súas mensaxes facéndonos moi vulnerábeis. Con este panorama, contrastar a información procurando distintas fontes faise complicado pero imprescindible.

A estes medios, controlados polas grandes corporacións, interésalles manter e mellorar status que os favorece. Centran os esforzos para elo en:

Mellorar as ganancias e abaratar custos.

Tratan de conseguir financiamento público e privado, publicidade e abonados.
A precariedade laboral nos medios de comunicación é alta.
Apoian as reformas laborais e a flexibilidade laboral.

Manter a atención dos consumidores e potenciar o consumo.

Usan titulares simplistas, grandilocuentes ou tendenciosos.
Contidos e programas lixo de entretemento.
Gran cobertura de fútbol e deportes de masas. (E cobran por elo)
Se non cobran, venden datos ou publicidade ata na sopa.
Potencian o consumo compulsivo e superficial con bombardeos publicitarios.

Promover e apoiar o sistema económico que os beneficia.

Fomentan a economía de libre mercado liberal ou neoliberal.
Fan campañas mediáticas para favorecer as políticas do seu interese.
Exercen influencia e presións sobre os poderes públicos para obter lexislacións favorables ou para dificultar as tarefas de gobernos pouco afíns.
En xeral apoian e promoven a liberalización dos mercados e a privatización de servizos públicos como a sanidade, a educación, as pensións...

Manter a calma social.

Non lles interesa a contestación social e procuran neutralizala criminalizando, desinformando ou con informacións para desmobilizar creando alarma social e medo.
Empregan e potencian o entretemento e a distracción con programas lixo e contidos frívolos ou morbosos.
Confrontan as realidades sociais máis desfavorecidas e situacións tráxicas ou de miseria no mundo para neutralizar as críticas as miserias e inxustizas locais.
En xeral facilitan contidos irrelevantes ou intranscendentes ou manipulan a información de importancia.

Algunhas das estratexias informativas de cara a manipular eficientemente pasan por:

Crear campañas mediáticas destinadas a cambiar a opinión pública sobre temas concretos.

Campañas sobre resultados educativos, viabilidade das pensións, sanidade pública fronte a sanidade privada, mercado laboral e produtividade, actualidade política e internacional... entre outras.
Campañas destinadas a modificar o clima social.
Campañas sobre aumento da inseguridade e a delincuencia enchendo os medios de sucesos, problemas relacionados coa inmigración e calquera outra información de interese para infundir medo, alarma social e inseguridade na poboación.

Manipular a información.

Difundir informacións falsas ou mesmo inventadas. * Tratar de forma tendenciosa, parcial ou descontextualizada certas informacións.
Agochar ou ignorar determinadas informacións para que non cheguen á cidadanía ou destacar outras do seu interese. * Repetir ata a saciedade as manipulacións informativas.

Os medios de comunicación de masas e os axentes económicos que os financian teñen tomado tamén iniciativa activa en internet e nas redes sociais para amplificar o seu discurso e acadar as metas que se propoñen. Empregan para elo os recursos que ofrece o Big data e diversas ferramentas informáticas para coñecer os movementos sociais e anticipar tendencias. Tamén usan bots, contas falsas e mercenarios da información. Unha das actividades destes grupos tamén se centra en crear informacións falsas ou fake news.

Contaminación mental

Na ansia por descerebrar á audiencia, os medios máis casposos enchen de lixo as canles das televisión. Especialmente aquelas emitidas en aberto, cheas de publicidade, que son vistas polas xentes máis humildes. Somos líderes mundiais en facernos selfies e na emisión de telelixo[3]. Realities, venta de produtos milagre, debates a berros cheos de contidos superficiais groseiros e morbosos, canles de ventas e chamadas con teléfonos de tarifa especial. Calquera cousa vale para insultar a intelixencia e darlle unha labazada ao espectador.

3: https://es.wikipedia.org/wiki/Telebasura

lixo [IMX]

O telelixo está a fomentar prototipos indesexables na xuventude

O gran problema é que esta realidade paralela[4] da televisión lixo é asumida como certa e mesmo como modelo a imitar pola xente menos preparada, especialmente pola xuventude. En moitos casos, os modelos e padróns que se transmiten convértense en referentes que son asumidos como propios.

4: https://www.homovelamine.com/

As canles máis promotoras de tanto bodrio televisivo acumulan denuncias e sancións por emitir contidos pouco apropiados e fora da protección horaria regulada. Insultos e berros, murmuracións, estratexias de todo tipo para desprestixiar ou xerar audiencia... Todo está ben pensado para enganchar e descerebrar ao espectador. E as multas son amplamente compensadas polas ganancias da publicidade. A finalidade deste tipo de programas é, como ben supoñedes, gañar audiencia e facer negocio. Pero, non menos importante, valen tamén para idiotizar á poboación e facela submisa. Para evitar que pense nos problemas importantes nin moito menos, en mudar as cousas.

Estes programas lixo teñen certas características en común:

Manipulan a información ou son claramente parciais.
Non respectan a privacidade e teñen obsesión pola vida dos famosos.
Buscan o morbo e fan espectáculo da dor, a miseria e o padecemento humanos.
Cosificación de xénero, especialmente no caso das mulleres.
Aspectos violentos ou recreándose en contidos e escándalos sexuais.
Linguaxe pouco apropiada con berros e insultos.
Ridiculización, menosprezo e promoción do individualismo e do egoísmo.
Fomentan e poñen como modelo a personaxes e situacións aberrantes...
Fan do máis desprezable, vulgar e abxecto un modelo a imitar.
En xeral desprezan a cultura, a ciencia e o mérito.

tvlibros [IMX]

Con tanta bazofia temos un panorama desolador. Vivimos nunha sociedade que cada vez mira máis o dedo cando o sabio sinala ao ceo. Unha sociedade de tonto o último chea de individualismo e baixa tolerancia á frustración. De psicópatas sen empatía nin interese algún pola vida en común. Chea de xente exasperada, insatisfeita e sem rumbo. Capaz de calquera cousa por tratar de satisfacer o seu insaciable ego.

Sería de interese facer algún estudo ou investigación para ver como se reproducen e espallan este tipo de modelos de comportamento na xente máis nova en idade escolar. Moito nos tememos que, á vista do aumento e o tipo de conflitos que están a darse nos centros educativos na actualidade, que a realidade está empezando a superar o telelixo. Algo que debería preocuparnos moito.

INICIO