💾 Archived View for gem.amigausers.ie › news_ie › 1638460937.gmi captured on 2021-12-03 at 14:04:38. Gemini links have been rewritten to link to archived content

-=-=-=-=-=-=-

Mianliosta mic léinn – moltaí bronntanas

Aifric Ní Scolaí, 02 Dec

Anois ní ag cuimhneamh orm féin atá mé agus an liosta seo á scríobh agam ar mhac léinn éigin eile, cur i gcás, atá ag maireachtáil ar Phot Noodles agus atá faoi dhianstrus, ag seoladh isteach a gcuid tascanna ollscoile nóiméad roimh an sprioc.

Arís, ní mé féin atá i gceist.

Seo liosta earraí, idir Ghaelach agus Éireannach, le tabhairt don mhac léinn bocht i do shaol a chuirfidh meangadh gáire ar a n-aghaidh agus a úsáidfidh siad arís agus arís eile

Mála canbháis

Ní fheicfidh tú mac léinn riamh gan mála canbháis ag luascadh dá ghualainn aige. Cur lena mbailiúchán trí cheann nua a cheannacht ó:

Bean an Tees

Éilís Cosgrove Designs

Design Wright

Mála droma

Ar an lámh eile, cé go bhfuil na málaí canbháis go hálainn, ní dhéanann siad aon mhaitheas don droim. Ceannaigh mála droma breá láidir do do mhac léinn agus beidh siad fíorbhuíoch. Déan cinnte go bhfuil sé sách mór dá gcuid leabhar/ríomhaire/iPad – seo ceann déanta don chás sin.

Nó dá mb’fhearr leat cloí le vibe an mhála canbháis, tá ceanna deasa anseo a bhfuil píosaí ealaíne clóite orthu nach mbrisfidh an banc, ná an droim ach an oiread.

Dialann

Go gairid i ndiaidh na Nollag, tagann Oíche Chinn Bhliana agus leis sin, rúin na hAthbhliana. Tug cúnamh do do mhac léinn bocht a dhéanann geallúint gan chomhlíonadh chuile bhliain go mbeidh siad eagraithe an bhliain seo chugainn. Tá a fhios ag chuile dhuine gurb é an bealach is fearr le bheith níos eagraithe ná a bheith in ann liostaí a dhéanamh!

Tá dialann bliana i nGaeilge le fáil ó Connect The Dots nó más fearr leat leabhar nótaí gan línte air, tá réimse álainn ag Míreog.

Coinnle

Deacair a ghabháil mícheart le coinneal. Cruthaíonn siad atmaisféar suaimhneach, bíonn boladh deas uathu, cuma dheas orthu agus iompóidh siad lóistín beag cúng craptha an mhic léinn isteach ina áit bheag the theolaí.

Tá ceanna ag lámhdhéanta ar fáil ar gealach.ie.

Fuair mé cuid dom féin an samhradh seo caite agus tá siad thar barr.

Le dul leis an gcoinneal sin, tug lastóir ‘I don’t smoke’ ó eeerings dóibh, bronntanas a bheas díreach ceart don ócáid.

Rud ar bith a bhaineann le caife

Caitheann muid (mar mhic léinn) fortún ar chaife. Tá seit iomlán ag caife.ie don té ar breá leo caife.

Más rud éigin níos lú atá á lorg agat, ní ghabhfadh tú amú le muigín caife le breith leat Mo léan ní raibh mé in ann theacht ar cheann ar bith a raibh Gaeilge air, ach tá ceanna ar an suíomh seo de dheantús na hÉireann agus réimse breá dathanna leis.

Earraí don chraiceann

Leis an méid a bhíonn ag dul ar aghaidh sa gcoláiste amantaí bíonn sé deacair am a ghlacadh le haire a thabhairt do do chraiceann nó an t-airgead a a chur ar leataobh le stuif maith a cheannacht duit féin. Fuair mise samplaí d’earraí Pestle & Mortar anuraidh agus thaitin siad go mór liom – tá mé á santú ó shin! Tá lascaine faoi láthair acu agus is fiú chuile phingin iad.

Ach don mhac léinn ollscoile seo atá ag filleadh ar an mbaile den chéad uair ó mhí Lúnasa, is é an bronntanas is fearr an dinnéar breá Gaelach a leagfar os mo chomhair an tráthnóna a thagaim abhaile. Agus an fry. Agus an mharóg Nollag.

(An mó dúil atá agam i mo bholg ná mo thuismitheoirí a fheiceáil arís? Níl sé chomh fada sin ó shin ó chonaic mé iad).